Ֆլեշմոբյան առաջադրանքներ

Հունիս, 2020 թվական

6-8-րդ դասարաններ

Դեկտեմբեր, 2019 թվական

  • Նշվածներից ո՞րն է ավելորդ:

Աստծո գառ, Նոյի ագռավ, սև աղվես, տրոյական ձի, առաջին ծիծեռնակ, թրջված հավ, սպիտակ գորտ, անատամ գայլ:

Պատասխան՝ սպիտակ գորտ:

  • Տրված դարձվածային բառակապակցությունները թարգմանված են բառացի։ Հասկանալով դրանց իմաստները՝ գրե՛ք հայերեն համարժեք դարձվածքները:

ա) Когда рак на горе свистнет (ռուսերենից բառացի`երբ խեցգետինը սարի գլխին կսուլի)-

բ) Crows don’t pick crow’s eyes (անգլերենից բառացի՝ ագռավը ագռավի աչք չի հանի)-

գ)  L’enclume et le marteau (ֆրանսերենից բառացի՝ մուրճի և զնդանի արանքում)-

Պատասխաններ՝ էշի զատկին, շունը շանը չի կծի, երկու կրակի արանքում:

  • Նույն ժեստը տարբեր երկրներում կարող է միանգամայն տարբեր նշանակություններ ունենալ: Այլ երկրի, ժողովրդի մշակույթը հասկանալու համար կարևոր են նաև ժեստերը: Գտի՛ր  տվյալ ժեստի նշանակությունը հայերի համար:

Մատը քունքին պտտել

Արգենտինայում այդ ժեստով կանչում են հեռախոսի մոտ:

Պերուում նշանակում է մտավոր աշխատանքով զբաղվող մարդ:

Հայաստանում…:

Պատասխան՝ Հայաստանում արտահայտում է վիրավորանք՝ ինչ-որ մեկի հիմար, անխելք լինելը:

  • Ուղղել բառագործածական սխալները:

ա) Կառավարությունը ծրագրավորել է կենսամակարդակի բարելավմանը հատկացված գումարները ավելացնել ևս տասը տոկոսով։

բ) Հանձինս Անդրանիկի մենք ճանաչում ենք խղճի ու հերոսականության ասպետին:

գ) Մեր մարզիկները դրսից շատ հրավերքներ են ստանում:

դ) Տղաս ակտիվորեն մասնակցել է թերթի հրատարակչությանը։

ե) Թուրքիան հայ ժողովրդի դեմ կատարած մեծագույն հանցանքի համար այսօր պիտի մեղանչի:

 զ) Քամի բարձրացավ, և ցերեկվա տոթը տեղիք տվեց երեկոյան զովությանը:

Պատասխաններ՝ ծրագրավորել-ծրագրել, հանձինս-հանձին, հրավերքներ-հրավերներ, հրատարակչություն-հրատարակություն, մեղանչել-զղջալ, տեղիք տալ-տեղի տալ:

  • Գտի´ր ամեն շարքի ավելորդ բառը:

ա) Ձյունանուշ, Ամանոր, սահնակ, տոնածառ:

բ) Փաթիլ, եղջերու, նվեր, նամակ:

գ)Կաղանդ պապ, Սանտա Կլաուս, Մեծ Պապուկ, Ձմեռ պապ:

Պատասխաններ՝ ա)սահնակ (պարզ բառ է, մնացածը բարդ են), բ) եղջերու (շնչավոր է, մնացած գոյականներն անշունչ են), գ) Սանտա Կլաուս (հայկական անվանում չէ):

  • Տրված բառերի արմատներով կազմել նոր բառեր:

Տարեմուտ, կախազարդ, կեսգիշեր,  ձեռնափայտ, նամականիշ, լուսանկար, օրացույց, շրջապտույտ, անուշապուր, զրուցակից, սիրառատ, լուսատու:

  • Գրական ստեղծագործությունների տրված անվանումներից ո՞րն է տարբերվում մյուսներից:

ա) Ձախորդ Փանոսը

բ) Քաջ Նազարը

գ)Կռնատ աղջիկը

դ) Կիկոսի մահը

Պատասխան՝ Կռնատ աղջիկը, քանի որ դարձվածային նշանակություն չունի և հատուկ անուն չի պարունակում:

  • Տրված բանաստեղծական հատվածում քանի՞ դարձվածային արտահայտություն կա: Ի՞նչ նշանակություն ունեն դրանք:

Մենք որսացինք ձուկը ոսկե,

Ոսկե ձուկը  բախտից քինոտ,

Երբ մնում են բազում ազգեր

Իրենց կոտրած տաշտակի մոտ:

Պատասխաններ՝ երկու՝ ոսկե ձուկ (ձկնիկ)- կյանքը բախտավոր կերպով շրջող գործոն՝ միջոց, կոտրած տաշտակի մոտ (առաջ) մնալ (կանգնել)-բռնած գործերի մեջ լրիվ ձախողվել, վերադարձ նախկին խղճուկ վիճակին:

  • Գրիր ամանորյա ուղերձ աշխարհի բոլոր երեխաներին: