Ուսուցչի անկյուն

14.06.2020

Բանգլադեշյան պլեներին շարունակում ենք մեր աշխատանքները տարբեր ուղղություններով: Սովորողներն ընթերցում են, թարգմանում, թարգմանածը հնչյունավորում, ինքնակրթվում: Ես էլ, նրանց մշտապես օգնելով, իրականացնում եմ նաև անհատական նախագծերս: Սկսել եմ աշխատել հաջորդ ուստարվա նախագծերի, լրացուցիչ կրթության աշխատանքների մշակման ուղղությամբ:

13.06.2020

Չորրորդ ուսումնական շրջանի ընթացքում սովորողների հետ հասցրինք մասնակցել տարբեր ստուգատեսների` թարգմանչական, ինքնակրթության, վլոգինգային փառատոնի, էպոսյան փառատոնի, հասցրինք համագործակցել վերջին ուղղությամբ Դիտավանի հիմնական դպրոցի հետ: Ունեցանք տարբեր ձևաչափերով չկրկնվող հանդիպումներ: Սովորողներն իրենց նախընտրած ուղղություններով մասնակցում էին, առաջարկում իրենց գաղափարները, որոնք գրառել եմ ու կծառայեցնեմ նոր նախագծերի ստեղծման համար: Սովորողների ակտիվությունից դժգոհել չեմ կարող: Միայն կափսոսամ, որ իրավիճակը թույլ չտվեց որոշ բաներ իրագործել:

Անհատական մոտեցում գնահատման գործընթացում

Սովորողների կատարած աշխատանքը գնահատելիս կարևոր է անհատական մոտեցումը: Հեռավար-առցանցը ևս մեկ անգամ ընդգծեց ընտանեկան դպրոցի կարևորությունը: Գնահատականը պետք է արտացոլի ընտանեկան դպրոցների մասնակցությունը: Կարևոր են նաև սովորողի անհատական զարգացումը, աճը, ինքնակրթությանն ուղղված աշխատանքները:

Մեր մայիսը

Մայիս ամվա ընթացքում իրականացրինք հետաքրքիր աշխատանքներ, մասնակցեցինք մայիսյան հավաքի ուշագրավ բազմաթիվ նախաձեռնությունների: Էպոսյան նախագծեր ունեցանք, մանրամասնորեն քննարկեցինք հատկապես առաջին ճյուղը: Կազմակերպվեց նաև համատեղ նախագիծ Մարինե Ամիրջանյանի հետ: Հինգերորդցիներն ու վեցերորդցիները համատեղ էպոսյան ընթերցումներ ունեցան ու փոխանակվեցին խորհուրդներով: Վերջում էլ ուսումնասիրեցինք գովազդի լեզուն ու ստեղծեցինք ինքնատիպ գովազդներ:

Սովորողների և ծնողների առաջարկների ամփոփում

Վեցերորդցիների և նրանց ծնողների հետ քննարկեցինք հաջորդ տարվա ուսումնական պլանը: Քննարկման հետաքրքիր ձևաչափ ընտրեցինք: Սովորողներն ու ծնողներն իրենց առաջարկներն էին ներկայացնում, իսկ հետո դրանք քննարկում էինք: Սովորողներն իրենց ընկերների որոշ առաջարկների խելամտության, հնարավորության, նպատակահարմարության շուրջ բանավիճում էին, հիմնավորում իրենց կարծիքները: Ահա արված առաջարկները:

  • Բնագիտական առարկաների ժամերի ավելացում կամ ընտրությամբ գործունեության մեջ ևս ներառում:
  • Միջդասարանային ֆուտբոլային հանդիպումներ ևս կազմակերպվեն:
  • Սովորող-սովորեցնող ձևաչափի նախագծերի ավելացում:
  • Պարերի և երգերի մեջ ժամանակակից տարրերի ավելացում:
  • Զինվորական պատրաստության հմտությունների ավելացում:
  • Բարեգործական նախագծերի  իրականացում, սեփական աշխատանքների` իրերի ու զարդերի տոնավաճառ ու նվիրատվություն:
  • Ընտության գործունեության մեջ հետևյալ ավելացումների առաջարկներ.
  1. մարզաձևեր` ձիավարություն, շախմատ, լող, հեծանվավազք, ջրագնդակ, չմշկավազք, բռնցքամարտ, ըմբշամարտ, վազք, մեծ թենիս, ավելի մասնագիտացված մարմնամարզություն, բիաթլոն:
  2. արհեստներ` շինարարություն, շոկոլադի արտադրության ուսուցում, ապակե իրերի արտադրություն, ատաղձագործություն, գինեգործություն:
  3. արվեստ` օրիգամի, թատերական, դիզայն և մոդելավորում, երաժշտական գործիքների ուսուցում, կենդանիների և բույսերի խնամք, վիրավոր կենդանիների խնամք և տեղափոխում ագարակ:
  4. լեզուներ` թուրքերեն, գերմաներեն, կորեերեն, չինարեն, ճապոներեն, ուկրաիներեն, արաբերեն:
  5. գիտություներ` հոգեբանություն, անասնաբուժություն, համակարգչային հատուկ ծրագրերի ուսուցում` կայքերի ստեղծում, մոնտաժ, խաղերի, լոգոների ստեղծում:

Շաբաթվա աշխատանքների դիտարկումային ամփոփում (13.04-17.04)

Բլոգների ուղղությամբ արված աշխատանքների մասին

Այս շաբաթվա մեր աշխատանքների հիմնական ուղղություններն ընտանեկան ընթերցումները, սովորողների հեղինակած նախագծերն ու բլոգային ստուգատեսին մասնակցությունն էին: Սրանք երկշաբաթյա աշխատանքերն են: Արդյունքները դեռևս հավաքման փուլում են: Մենք այս շաբաթվա` յուրաքանչյուր դասարանի համար նախատեսված երկու տեսադասերից մեկը տրամադրեցինք`վերհիշելու սովորողի բլոգին ներկայացվող պահանջները: Սկսել ենք ու շարունակում ենք իրականացնել այդ ուղղությամբ «Մի բլոգի հետքերով» նախագիծը`ուղղված սովորողի սեփական ու ընկերոջ բլոգի ուսումնասիրմանն ու նրա թերությունների շտկմանը: Ինչպես սովորական, այնպես էլ այս աշխատանքը ավելի ոգևորեց միշտ պատրաստ ու ակտիվ սովորողներին, իսկ մի փոքր խումբ`խորհուրդներ չսիրող ու չընդունող, առանձնապես աշխատել չցանկացող, այստեղ ևս դեռ պասիվություն է ցուցաբերում: Հուսամ`գոնե ընկերների կողմից նրանց բլոգների սխալների դիտարկումը կօգնի սա հարթել: Ընդհանուր վերցրած`բլոգների վրա շատերը բավական աշխատել են: Որոշները փոխել են անգամ բլոգի դիզայնը`նորը ընտրելով, ինչը թույլ կտա նախկինում եղած շատ թերություններ շտկել:

Շաբաթվա աշխատանքների դիտարկումային ամփոփում (6.04-10.04)

Ամփոփելով շաբաթվա աշխատանքները` կարող եմ փաստել, որ «Անահիտ» հեքիաթի և համանուն մուլտֆիլմի համեմատական աշխատանքներն ու դրանց հետ կապված վերլուծական աշխատանքները բավական արդյունավետ էին: Սովորողները մեծ ակտիվությամբ մասնակցեցին դրանց: Տարաբնույթ էին նաև զատկական աշխատանքները` տեսանյութեր, ռադիոնյութեր, պատումներ: Մեր ստեղծագործական աշխատանքներն ու պատումներն այս անգամ նվիրված էին մեկամսյակի ամփոփմանը, արտակարգ իրավիճակի շարունակականությանն ու մանկական գրականությանը: Վերջինիս նվիրված աշխատանքներն էլ էին շատ, այս թեմայով հավաքվեցին տարաբնույթ տեսանյութեր, հարցազրույցներ ու պատումներ: Հարցախեղդի ֆլեշմոբն ամփոփեցինք: Սովորողներից ստացա շուրջ երեք տասնյակ հեղինակային նախագծեր` որպես մրցույթ-աշխատանքի հայտեր: Ներառական կրթությամբ սովորողների մի մասը ընտրեց մեր սովորական աշխատանքները, մյուս մասի հետ ընտրեցինք առավել հարմար աշխատանքներ:

Շաբաթվա աշխատանքների դիտարկումային ամփոփում (6-րդ դասարան)

Վեցերորդցիներն այս շաբաթ մայրենի դասավանդողների նախաձեռնությամբ իրականացրել են մի շարք հետաքրքիր նախագծեր: Հասմիկ Թոփչյանի դասավանդած վեցերորդցիներն ունեն գեղեցիկ ընտանեկան ընթերցումներ: Երանուհի Խլղաթյանն առաջարկել է Դպիրը ծնողական ընթերցարան դարձնելու, զատկական և ընտանեկան նախագծեր: Անուշ Ներսիսյանը առանձնացրել է մանկական գրականության ընտանեկան ներկայացման նախագիծ: Կարծում եմ, որ շաբաթը բավական արդյունավետ էր հատկապես աղայանական օրերին և մանկական գրականությանը նվիրված ընտանեկան նախագծային աշխատանքների առումով: Իմ շաբաթվա նախագծերից կառանձնացնեմ ընտանեկան զվարճալի հարցախեղդի ֆլեշմոբը, որին սովորողների ակտիվ մասնակցությունը ևս մեկ անգամ փաստեց յութուբյան ձևաչափերի նախագծային կիրառության արդյունավետությունը: Ունեցանք նաև մանկական գրականությանը նվիրված այլ նախագծեր: Այժմ իրականացվողներից իր հետաքրքրությամբ կառանձնացնեմ հատկապես «Անահիտ» հեքիաթի և համանուն մուլտֆիլմի ուսումնասիրությանն ու համեմատմանը նվիրված նախագծերը:

Շաբաթվա առաջադրանքներ, նախագծեր

Շաբաթվա ընտանեկան նախագծեր

Շաբաթվա աշխատանքների դիտարկումային ամփոփում

Ամփոփելով հեռավար-առցանց ուսուցման շաբաթը` կառանձնացնեմ հետևյալ դիտարկումները.

  1. Տեսադասերն արդյունավետ են ու հաճելի: Չեմ չափազանցնի` ասելով, որ անգամ ֆիզիկական միջավայրում իրականացվող դասերին հավասար կլանում են սովորողին: Բայց կան որոշ խնդիրներ ներառական կրթությամբ սովորողների համար: Նրանց մի մասի հետ տեսադասերի արդյունավետության խնդիր կա: Մշտական կապ եմ պահում ծնողների հետ, պայմանավորվում ենք անելիքների համար, մասնակցում են տեսադասերին, բայց սովորողները նոր են հաղթահարել տեսադասերի հետ կապված դժվարությունները, ներառական կրթությամբ սովորողների համար դա անհամեմատ բարդ է: Մի քանիսին խանգարում են ֆիզիկական խնդիրները, մյուս մասի համար ընկալման դժվարություն է ստեղծում ձևաչափը: Կարծում եմ, որ կարևոր հարց է նաև ընտանեկան նախագծերին նրանց ներառվածության խնդիրը:
  2. Այս շաբաթվանից ընտանեկան աշխատանքներից մեկնարկեց ընտանեկան զվարճալի հարցախեղդի ֆլեշմոբը: Նրա հաջողությունը ևս մեկ անգամ կվկայի յութուբյան ու սոցցանցային նախատիպեր ունեցող նախագծերի արդյունավետության մասին ու ցույց կտա սովորողների մեծ հետաքրքությունը դրանց նկատմամբ: Սովորողից բացի` պետք է ոգևորել նաև ծնողին: Պետք է հիշենք, որ ընտանեկան դպրոցի շրջանակներում աշխատում ենք տարբեր բնավորության ու նախասիրությունների տեր ծնողների հետ: Որոշ ծնողներ չեն ցանկանում երևալ տեսանյութերում կամ մասնակցել ձայնագրությունների պատրաստմանը: Ընտանեկան նախագծերը պետք է հարմար ու հաճելի լինեն բոլոր ծնողների համար: Պետք է որսալ նաև ծնողների հետաքրքրությունները:

Օրագրային դիտարկումներ հեռավար-առցանց ուսուցման շաբաթվա մասին

4.04.2020

Այսօր տեսադասեր ունեցա դասարաններիս հետ: Գերազանցապես կատարել ենք քերականական աշխատանքներ: Վերջապես ավարտին հասցրինք «Փոքրիկ իշխանի» քննարկումները: Գրքին նվիրված առցանց բանավեճերի արդեն չորրորդ ժամն էր: Իրոք, այս ժամանակահատվածը հիանալի հնարվորություն էր սովորողին ավելի ծավալուն գործերի ընթերցանության մղելու համար:

3.04.2020

Սովորողներն այս օրերին սկսել են ակտիվորեն իրականացնել ապրիլյան նախագծերը: «Անահիտ» ստեղծագործության քննարկման համար նախատեսել էի 2 շաբաթ ժամանակ: Կարծում եմ, որ այդ առումով որոշակիորեն սխալվել եմ: Երեկվա տեսադասին և այսօր հասկացա, որ շատերն արդեն կարդացել, ավարտել են: Այստեղ կարող է աշխատանքի արագացմանը նպաստած լինել համանուն մուլտֆիլմի ընտանեկան դիտումը մեկ այլ նախագծի համար: Հավանաբար այն հետաքրքրություն է առաջացրել գրքի ընթերցանության հանդեպ:

2.04.2020

Այսօր ևս տեսադասեր ունեցա բոլոր դասարանների հետ: Գրեթե ավարտեցինք «Փոքրիկ իշխան» ստեղծագործության քննարկումները: Սովորողների բլոգային աշխատանքներում ակտիվություն ու հետաքրքրություն կա հատկապես ընտանեկան զվարճալի հարցախեղդի ֆլեշմոբի նկատմամբ:

1.04.2020

Ղազարոս Աղայանի «Անահիտ» հեքիաթի և համանուն մուլտֆիլմի հետ կապված աշխատանքները անասելի ոգևորել են սովորողներին: Կարծում էի, թե կարող են դժվարանալ, բայց սիրով աշխատում ու ուղարկում են թեմատիկ նախագծերը:

31.03.2020

Սովորողների հետ «Փոքրիկ իշխան» ստեղծագործության տեսադասային բազմաժամ քննարկումների արդյունավետությունը նկատելի է դարձել նաև բլոգային աշխատանքներում: Եթե սովորողների մի մասը մինչ հիմա գիրքը չէր կարդացել, այժմ ընթերցել, ավարտել ու գրում են իրենց ընթերցանական-վերլուծական աշխատանքները:

30.03.2020

Այսօր տեսադասեր ունեցա բոլոր դասարաններիս հետ: Սովորողները ոգևորված մասնակցում էին քննարկումներին: Նրանց մոտ հավաքված անթիվ հարցերին պատասխանելը երկար տևեց: Քննարկեցինք մեր անելիքները, շաբաթվա նախագծային աշխատանքները:

22.03.2020

Առցանց ուսուցման այս շաբաթվա ընթացքում բազմաթիվ նախագծեր իրականացրինք: Գրեթե բոլոր նախագծերին սովորողներն ակտիվ մասնակցեցին ու անգամ փորձեցին իրենց աշխատանքի գոնե որևէ մասով տարբերվել մյուսներից: Կային աշխատանքներ, որոնք մեզ մոտ պարզապես շարունակական էին, օրինակ` ստեղծագործական աշխատանքները, ընթերցանությունները: Կային նորարար նախագծեր, այսպես կոչենք` վիճակային` պայմանավորված բոլորին հայտնի իրադրությամբ: Ցանկի առաջին երկու նախագծերը հենց այդպիսին էին: Ի դեպ, այս շաբաթվա նախագծային փաթեթում դրանք մասնակցության լավագույն ցուցանիշ ունեցող նախագծերից էին: Աշակերտներին դուր եկավ ստեղծված վիճակի ուսումնասիրությունը: Ընտանեկան նախագիծ ևս ունեինք, որ հետաքրքիր արդյունքներ տվեց: Առցանց ուսուցման շաբաթն ամբողջացրինք տեսադասերով, որոնց ժամանակ ամփոփեցինք աշխատանքն ու հասկանալի դարձրինք անհասկանալին: Տեսադասերը գրավեցին աշակերտներին, ինչը հետագա առցանց գործունեության համար ոգևորիչ գործոն է:

17.03.2020

Առցանց ուսուցումը դասավանդածդ առարկայի հանդեպ աշակերտի հետաքրքրությունը չափող ինքնատիպ ստուգատես է: Առցանց ուսուցման նախագծերն ու առաջադրանքները պետք է հնարավորինս հետաքրքրաշարժ լինեն ու կապված լինեն ժամանակի կարևոր խնդիրների, աշակերտի անհատական հետաքրքրությունների հետ, ներառեն նաև ընտանիքի անդամներին, փոքր-ինչ զվարճալի լինելն էլ չէր խանգարի:

16.03.2020

Մինչ առցանց ուսուցման հերթական շաբաթվան անցնելը, օգտվելով ֆիզիկական միջավայրում ծավալվող ուսումնառության ընթացքից, դասալսումներ ունեցա տիկին Մարիետի և ընկեր Արևի դասաժամերին: Դասալսումներից անվերջ կարելի է սովորել: Արևի դասերից կարելի է քաղել հատկապես պարբերաբար գրավոր և բանավոր աշխատանքները միմյանցով հաջորդելու գործընթացի կարևորությունը: Տիկին Մարիետի դասին ունեցածս ներկայությունը զարգացրեց քերականական աշխատանքների ու տերմինների անվանածագման` տրամաբանություն զարգացնող մեթոդների կիրառման կարևորությունը:

Առաջին սեբաստացիական տարեդարձս

27.01.2020

Ճամբարային շրջանը բացառիկ հնարավորություն է տալիս ավելի լավ ճանաչելու քեզ արդեն հարազատ դարձած աշակերտներին, հասկանալ նրանց աշխարհայացքային առանձնահատկությունները, տարիքային առանձնահատկության բերած կնիքն ու նախասիրությունների գլխապտույտ բազմազանությունը: Ճամփորդություններն էլ անասելի մտերմացնում են մեզ միմյանց. միասին ապրում ենք հրաշք պահերը, միասին վախենում կամ լարվում, կատակում կամ ծիծաղում, բացահայտում ու հրճվում, միասին ենք սառչում ու ուրախանում ամենափոքր ջերմությունից: Մենքն ավելի իսկական ու սիրուն է դառնում:

5.11.2019

Երբեմն պետք է տվյալ ժանրով ստեղծագործությունների ընթերցանության ընտրությունը թողնել աշակերտին։ Դա նպաստում է գրական ճաշակի ձևավորմանը, ժանրի հանդեպ հետաքրքրության ավելացմանը։

4.11.2019

Հեքիաթի տարբերակների քննությունն ու համեմատությունը հետաքրքիր ու օգտակար աշխատանք է։

23.10.2019

Տեքստերի ենթատեքստերը գտնելը կարողություն է, որ պետք է զարգացնել երեխայի մոտ մանկուց: Աշակերտը ժամանակի ընթացքում ակամա սկսում է կարդացածում փնտրել թաքնվածն ու խորքայինը, ինչը հետագայում վերաճելու է գիտական բնույթի վերլուծություններ կատարելու մեծ կարողության:

21.10.2019

Աշակերտները պետք է ստեղծեն իրենց առասպելները՝ ծանոթանալով հին հայկական աստվածներին ու նրանցից ընտրելով իրենց համար հոգեհարազատներին: Աշխատանքը կբացահայտնի աշակերտների ստեղծագործական կարողությունները՝ ամրապնդելով ժանրի ու հայկական հեթանոսական դիցարանի մասին գիտելիքները:

18.10.2019

Ապրումակցումը երեխաների մոտ զարգացնելու ու կերպարների ապրումները, արարքների դրդապատճառները ճիշտ հասկանալու համար օգտակար է բերել օրինակներ սեփական կյանքից կամ աշակերտներին պատկերացնել տալ իրավիճակը սեփական կյանքում: Դա հաճախ է հանգեցնում անկեղծ զրույցների` ամրապնդելով ուսուցիչ-աշակերտ կապը, տվյալ թեմայի հանդեպ ոգևորություն ծնելով երեխաների մոտ:

16.10.2019

Դասն այս կամ այն հերոսի անունից պատմելը նպաստում է սյուժեի ու կերպարների ամբողջական ընկալմանը՝ առավել հետաքրքիր դարձնելով դասը պատմողի ու ունկնդիրների համար:

15.10.2019

Երբ տնային շարադրանքների թեմաները սերտորեն կապված են լինում դասին քննարկված ու հանձնարարված նյութի հետ, աշակերտը փորձում է լավագույնս ըմբռնել անցածն ու ստեղծագործական մոտեցում է ցույց տալիս դասանյութի հանդեպ: Հատկապես հնագույն լեգենդների ու հեքիաթների արդիականացված տարբերակներն են հաճախ ուշագրավ լինում:

14.10.2019

Տարբեր ազգերի գրականության նմուշներին ծանոթանալը թույլ է տալիս զուգահեռներ տանել առաջին հերթին հայ գրականության հետ, ինչը զարգացնում է ուսումնասիրման համեմատական մեթոդի կիրառման հմտությունները:

11.10.2019

Ամփոփիչ աշխատանքների արդյունավետությունը պայմանավորված է նրանով, որ այն թույլ է տալիս վերհիշել ու հիշողության մեջ ամրակայել շաբաթվա անցածը, հասկանալի դարձնել անհասկանալին ու տեղում լրացնել ընթացքում բաց թողնված ցանկացած նյութ:

10. 10. 2019

Դաս վարելիս հաճախ են օգնության հասնում աշակերտների հետ ունեցած ընդհանուր հետաքրքրության առարկաները՝ ֆիլմերը, երգերը,հաղորդաշարերը, անգամ՝ խաղերը: Աշակերտին առավել հաճելի է լսել օրինակներ սեփական հետաքրքրություններից, դրանցում բացահայտել գիտական կարևորության տարրեր:

9. 10. 2019

Հատուկ կարիք ունեցող երեխաների համար բլոգում տեղադրվեց հայկական հեքիաթներից մեկի անիմացիոն տարբերակը։ Տեսանյութին հաջորդում էին հեքիաթի հետ կապված հարցեր։Այսօր երեխաները մեծ ոգևորությամբ դիտեցին մուլտֆիլմը, բանավոր ներկայացրին հեքիաթն ու պատասխանեցին հարցերին։

8.10.2019

Դասարաններից մեկում դերային տարբերակով ներկայացրին հանձնարարված իտալական հեքիաթը։Նման ներկայացումները բավականի նպաստում են ստեղծագործության կերպարների և սյուժեի ամբողջական ընկալմանը։

Դասավանդման գործընթացում անկանխատեսելի խնդիրներ հաճախ են առաջանում: Անասելի հաճելի է դրանք հարթելու գործում կողքիդ տեսնել հոգատար գործընկերների ու նույնչափ հոգատար աշակերտների, որոնք զարմացնում են իրենց պատրաստակամությամբ ու ջերմությամբ: Նման դեպքերում հաղթահարելի է թվում ցանկացած արգելք: